نحمدك ياكريم ومابرجواك ياس
ياجزيل الوهايب يامديم النعم
ماعلى الدار ضيم ولاعلى الجود باس
يوم عود حبيب الدار شيخ الكرم

طاب سلطان ابو خالد وزال العماس
وانتهت كل ضيقه وانجلى كل هم
بشروا به قلوب قد طواها اليباس
اونست من فراق الشيخ مثل اليتم

وبشروا به عيون مانهشها النعاس
لاغصيبه ولاحتى بحبة خشم
وبشروا به طوابير سقاها حماس
لين رويت سواعدها ثبات وعزم

وبشروا كل عز ماعليه ألتباس
وبشروا ياسلام وبشروا يالنعم
الف لاباس ياللي ما أنهزع منك باس
رغم الأوناس وامرار الدواء والألم

غبت عنا قوي أيمان مرفوع راس
وجيت سالم وغانم شامخ مبتسم
ياهلا بك عدد ما أسمل جديد اللباس

وعد ماحطمت بالجود كفك رقم

كن لقياك ماء وكن الايام كاس
مدها الله وزال بها العطش والسقم
جيتك عيد وغيابك ظلام ودماس
بك تباشر قلوب وبك ترسخ قيم

تعتزي فيك ناس وتبتحل فيك ناس
وانت في كل حالاتك جواد شهم
مال علياك ياعلو المكارم قياس
يابعيد الهقاوي يالأبي الاشم

ياوسيع البنايد ياصعيب المراس
ياحجانا ليا ضاق المدى وازدحم
ياكريم السجايا ياصدوق الحواس
لا كبت بك جواد ولاعثرت بك قدم

مانشدنا قصايدنا على اية اساس
ترتكز في الحنايا مثل ركز العلم
لأنك انت البديع ولأنك انت الجناس
ولأن نبض القلوب اللي تحبك قلم

دمت للدار نبض ودمت للطيب ساس
سيدي من وجودك لاخلا ولاعدم