انا الذي عشت الزمن مضيعه – صلاح جاهين

انا الذي عشت الزمن مضيعـــــــــه بروح حزينة معفنة مضعضعــــــه زرعتشجرة سنط لجل انجــــــرح لقتها شعر البنت و مفرعــــــــــــه عجبي

انا الذي عمري اشتياق في اشتياق – صلاح جاهين

انا الذي عمري اشتياق في اشتيـــاق و قطر داخل في محطة الـــــــــفراق قصدت نبع السم وشربت ســـــــــم من كتر شوقي وعشمي في التريـــاق عجبي

غمست سنك في السواد يا قلم – صلاح جاهين

غمست سنك في السواد يا قلـــــــــــــــم عشان ما تكتب شعر يقطر ألــــــــــــــــم مالك جرالك إيه يا مجنون … و ليــــــــه رسمت ورده وبيت و قلب و علـــــــــــم عجبي

فتحت شباكي لشمس الصباح – صلاح جاهين

فتحت شباكي لشمس الصبـــــــــــــــــاح ما دخلش منه غيــــــــــر عويل الريـــاح و فتحت قلبي عشان ابوح بالألـــــــــــــم ما خرجش منه غير محبه و سمــــــــاح عجبي

مرحب ربيع مرحب ربيع مرحبه – صلاح جاهين

مرحب ربيع مرحب ربيع مرحبــــــــــه يا طفل يا للي ف دمي ناغا وحبــــــــا علشان عيونك يا صغنن هويــــــــــــت حتي ديدان الأرض و الأغربــــــــــــــة عجبي

يا ميت ندامه ع القلوب الخلا – صلاح جاهين

يا ميت ندامه ع القلوب الخـــــــــــلا لا محبة فيها و لا كراهـــــــــــه ولا حتي يا قلبي الحزن ما عادش فيـــــك معلهش .. لك يوم برضه راح تتملا عجبي

إيديا في جيوبي وقلبي طرب – صلاح جاهين

إيديا في جيوبي وقلبي طــــــــرب سارح في غربة بس مش مغترب و حدي لكين ونسان و ماشي كده وبابتعد ما اعرف .. أو باقـــــترب عجبي

زحام و أبواق سيارات مزعجة – صلاح جاهين

زحام و أبواق سيارات مزعجـــــة للي يطول له رصيف.. يبقي نجـــا لو كنت جنبي يا حبيبي أنــــــــــــا مش كنت أشوف إن الحياة مبهجة عجبي

ياللي عرفت الحب يوم و انطوي – صلاح جاهين

ياللي عرفت الحب يوم و انطــــــــــــوي حسك تقال مشتاق لنبع الهـــــــــــــــوي حسك تقول مشتاق لنبع الغــــــــــــــــرام ده الحب .. مين داق منه قطره…ارتوي عجبي

حدوته عن جعران و عن خنفسه – صلاح جاهين

حدوته عن جعران و عن خنفســــــــــه اتقابلوا حوا بعض ساعة مســـــــــــــــا و لا قال لهم حد اختشوا عيب حـــــرام و لا حد قال دي علاقة متدنســــــــــــــة عجبي

أنا إله الوجد رب الهيام – صلاح جاهين

أنا إله الوجد رب الهيــــــــــــــــام أضرب بسهم الوهم وهم الغـــــرام و هم الغرام من كتر ما هو لذيـــــذ رشقت انا ف صدري جميع السهام عجبي

آه لو انا و محبوب جزنا الفضا – صلاح جاهين

آه لو انا و محبوب جزنا الفضـــــا في سفينة وحدينا .. واشيا رضـــا ساعة صفا تعجبنا نرجع لهــــــــــا و الهم قبل ما ييجي .. يبقي مضـى عجبي

إنشد يا قلبي غنوتك للجمال – صلاح جاهين

إنشد يا قلبي غنوتك للجمــــــــــــــــــال و ارقص في صدري من اليمين للشمال ما هوش بعيد تفضل لبكره سعيــــــــــد ده كل يوم فيه الف الف احتمـــــــــــــال عجبي

مزيكة هادية الكون فيها انغمر – صلاح جاهين

مزيكة هادية الكون فيها انغـــــمر وصيف و ليل و عقد فل و سمر يا هلتري الناس كلهم مبسوطين و يا هلتري شايفين جمال القمر ؟ عجبي

كرباج سعاده وقلبي منه انجلد – صلاح جاهين

كرباج سعاده وقلبي منه انجلد رمح كأنه حصان و لف البلد و رجع لي نص الليل و سألني .. ليه خجلان تقول انك سعيد يا ولد عجبي

صوتك يا بنت الإيه كأنه بدن – صلاح جاهين

صوتك يا بنت الإيه كأنه بدن يرقص يزيح الهم يمحي الشجن يا حلوتي و بدنك كأنه كلام كلام فلاسفه سكروا نسيوا الزمن عجبي

النهد زي الفهد نط اندلع – صلاح جاهين

النهد زي الفهد نط اندلع قلبي انهبش بين الضلوع و انخلع ياللي نهيت البنت عن فعلها قول للطبيعة كمان تبطل دلع عجبي

كان فيه قمر كأنه فرخ الحمام – صلاح جاهين

كان فيه قمر كأنه فرخ الحمام علي صغره دق شعاع شق الغمام أنا كنت حاضر قلت له ينصرك إشحال لما حتبقي بدر التمام عجبي