جمالها يبهر – ممدوح العضيباوي

لي مهرتن تجمح ماهي بمعسوفه
عزة على الفرسان محدن عسفها
من رادها نال التعب والكلوفه
يرجع ونفسه تشتكي من كلفها

من صغرها بستانها به قطوفه
تزهر وتبقى فيه محدن قطفها
بالحسن من بين البنات معروفه
محدن جهل مقدارها لا عرفها

جمالها يبهر وتسحر وصوفه
يعجز يوفي وصفها من وصفها
قدامها ياقف ويبطي وقوفه
واله الشرف في وقفته لا وقفها

ودي بها شعري يعزف معزوفه
ياعلها تطرب خفوقن عزفها
البدر كنه وجهها لو تشوفه
لامن فقدت البدر تعال شفها

رجيحتن بالعقل ماهي مخفوفه
لا سلهمت بالعين جنب وخفها
مادام هي كانت ماهيب معسوفه
تسوا حياة الفارس اللي عسفها

كلمات: ممدوح العضيباوي

ألحان: ممدوح العضيباوي

إنتاج: ممدوح العضيباوي

1441