like-empty

كلمات

klmat.com

sun
أدخل على الله وأسلم الأمر تسليم
وأستغفره وأستذكره وأستميحه
وضح النوايا والمساري مجاهيم
والحلم غالي والليالي شحيحه

سادت مفاهيم وبادت مفاهيم
ويح الزمن يابنت الأجواد ويحه
خلي علوم ممسسين المرازيم
وأخذي علوم مصمصين القريحه

حنا سلايل عبس يامذير الريم
حنا مقابيس الوغى يامليحه
حنا سلايل قاسم الخيل ودليم
فزعاتنا يوم المكايد رجيحه

بدو حفايا ما أنصفتنا المقاسيم
وبصدورنا عز تطارخ فحيحه
نرعى رفيف البرق في ساقة الغيم
ومن يستبيح حدودنا مانبيحه

وليا ترع في هرجته دفش وبهيم
خطو الهبود اللي تكابر فطيحه
عن ساقط الهرجه نطق الملاطيم
ومن طاح فيها مارحمنا مطيحه

نكبر عن الطفسه ونجزع من الضيم
ونموت ماناطا شليل الفضيحه
نزوم زومات الرجال المحاشيم
ونهد هدات النمور الجريحه

ربع على در المنايا مفاطيم
ومن هازنا زاغت عجوزه تصيحه
أليا تغشلينا عسير الشغاميم
لومك على اللي مايبرهن مديحه

وأن لولشن محشمات الملاثيم
والموت حثرب بالحناجر ضبيحه
جينا من أقصانا سحاب مراديم
كل يذكي حروته عن نطيحه

يازين دح قفوشنا له ترانيم
والعج واقف والفعايل صريحه
كان المنايا سوقها مابعد سيم
والخوف برك بالقلوب الكسيحه

حنا زباينها علي الملازيم
علم يقريه النصيح لنصيحه
واللي بنى بيته نبيه أبراهيم
إنا طريق المستميت لضريحه

بني رشيد إن عتّم الجو تعتيم
ماللردى فينا مواري وليحه
أجسر من الرعّاد وأكرم من الديم
سمر الجبال الوجيه الفليحة

يابنت ماحنا فقارى معاديم
ولو ماسكنا بالقصور الفسيحه
تجار لو حاشت يدينا ملاليم
ومن الغناه نفوسنا مستريحه

مانستضيق اليا لفونا معازيم
للضيف لو نذبح حدينا ذبيحه
دايم يدينا للعطايا مواليم
لاخانت الفزعه وجيه كليحه

طال القريض ومقبل الود ومقيم
والبال عيا طارقه لايريحه
أقولها وأبصم على القول تبصيم
والعلم بيّن زايفه من صحيحه

ماهو قصور بالحرار الصماصيم
كل بدرب العز قد هب ريحه
مدحي لربعي مايذم الأكاريم
ولايستشك الا خبيث الشريحه

الحق واضح للرجال المفاهيم
والحقد يخرث بالنفوس القبيحه
والشر من جيت معزي وهو نيم
واليوم وحده والشريعه سميحه
like-empty

كلمات مساعد الرشيدي

جاري التحميل...