ياللي جيت من شط تاني

حبتين ورجعت تاني

جيت منين .. ورحت فين ..

حاجة يابا محيراني

رحت فين يابا وفين راحوا اللي قبلك

بدي أقول لك كلمتين أنا بدي أقابلك

واسألك عن سر يابا.. سر حير ناس كتير

الصغير والكبير.. والغني قبل الفقير

انت يوم ما جدي جابك من هناك جيت منين؟

واما سبت الناس ودنيا الناس وراك رحت فين؟

واحنا جينا ازاي وليه؟

حكمة المشوار ده ايه؟

عم عباس الغفير

وسليمان ساعي المدير

والمحافظ والوزير

كلنا ماشين طابور والقدر داير يدور

بالكاسات بين المواكب ع اللي ماشي واللي راكب

واللي يجي الدور عليه يلقى كاسه بين إيديه

واللي يشرب كاسه يطلع م الطابور

واللي يطلع بيتاويه جوف القبور

والقبور سعرانه لم قالت كفاية

والقدر .. والقدر يسقي القلم دم الدواية

والقلم .. والقلم يكتب ويشطب

واللي يشطب اسمه يشرب .. سخن بارد كله وارد

مستحيل .. مخلوق حيهرب

رحت فين يا با وفين راحوا اللي قبلك

بعد مشوار العذاب إيه إنكتبلك

اللي راح قبلك ماجاش من يوم ما راح

واللي جه بعدك بينده ع اللي راح

بس فين هوه اللي راح يشوف ويسمع

اللي راح مجبش سيره

واللي جاي غرقان في حيرة

والطابور ماشي وجاهل ايه حكايته

القدر هو اللي شايف ايه بدايته

والقدر هو اللي عارف فين نهايته

وإحنا ماشين في المواكب

زي قلعان المراكب

قد ما يميل الهوا بنميل معاه

لا قلنا لأه يا هوا ولا قلنا أه

واللي يقدر بالعمل يترك أثر في الطابور

يبقى اسمه في الخلود رغم القدر والقدور

هي دي من غير كلام

حكمة المشوار تمام

واسأل الناس الكتير

الصغير والكبير والغني زي الفقير