يا ابني بلادك قلبك اعطيها وغير فكرك ما بيغنيها

ان ما حميتها يا ابني من الويلات ما في حدا غيرك بيحميها

بيّك موصّي لك قبل ما مات بلادك صلاة للحب صلّيها

لوعليها ثقلت الحملات وشي عين غدر اتطلّعت فيها

مثل الأسد خليك بالحزّات صرخة بطل عالكون وديها

يا ابني بلادك يوم طلّ النور ضوّت نجومه عا روابيها

والمركب الأول القص بحورفيلك شراعه من شواطيها

أرزاتنا مرقت عليها دهور وبعدنا منكبر بماضيها

خضرا عكتف جبالنا ناطور جنون العواصف ما بيلويها

يا ابني بلادك جنّة الانسان بصوتك يا بلبل ضل غنيها

تنقل ما بين الورد والريحان وحكايتك للساقية احكيها

خليك يا ابني عالوطن سهران وعين اللي بيجيها النوم وعيها

وكلّ شبر بنذر من الأوطان أرضك لابنك بس خلّيها

يا ابني السما تضحك لك وتحميك وتضل درب العز تمشيها

وتلّة الأرزة نسرها تسمّيك وجوانحك عالريح عليها

والغار كل مواسمه يهديك وافكارك قناديل ضوّيها

عالشمس خلّي حلمك يودّيك وادراج فوق ادراج تبنيها

ويوم الرجوع بلادك تلاقيك وعنّك اخبار المجد ترويها