25 ميدان التحرير يوم هنعيش نفتكره كتير

عايزين بقى نفتكره بخير ونعيش ونفرح بالتغير

يا برادعي ياللي مولعها كبّر دماغك وسعها

كفاية العراق واللي عملتو دي مصر مش هتوقعها

شبابنا ده عاقل وكبير ياللي في ميدان التحرير

العالم متربص بينا وشعبنا بقى وضعه خطير

عملتوا ثورة جميلة بجد بشكل حضاري معملوش حد

بس فيه ناس بتقيد في النار وعايزة اللي عملتوه يتهد

مشاكلكو هتتحل أوام ومفيش تاني مسؤول هينام

ارحموا مصر ده ربنا نفسه خلق الدنيا في ست ايام

وقفتكم في ميدان التحرير خلت ناس تشمت وكتير

وناس ليها مصالح خاصة نطقت بعد ما كانوا صراصير

ثورتكم أهدافها قوية عايزين عدالة وحرية

لما دخل بينكم الأحزاب قلبت بفوضة وهمجية

أهالينا كلها مخنوقة فرحتنا صبحت مسروقة

متسمعوش من حد غريب ديه ناس دخيلة ومزقوقة

ديه خطط قعدوا ورسموها عشان بلدنا يهدوها

شوفوا الجزيرة بتعمل ايه بتساعد اللي بيهدوها

قاعدين يكبروا في الحكايات وكل يوم فتنة وإشاعات

متدوهمش الفرصة كفاية ده الميدان مليان كاميرات

صورتكم كانت صوت أكتر أشرف من العملة وأطهر

بلاش تمشوا ورا الكداب اسمعوا لشيخ الأزهر

يا شبابنا يا ضي عنينا العملا كترم حولينا

وقفتكوا في ميدان التحرير هتفرج الدنيا علينا

كفاية كده خليكوا واعين في عُملا بنكم لناس تانين

هما اللي ولعوا في الأقسام وسيبوا عليكم المساجين

حرقوا في مساكن ومزارع دخلوا البيوت نازل طالع

عشان شرفنا وأهالينا وقفنا كلنا في الشارع

يا شبابنا فكر واتحرك دول دخلوا وسطينا بالمرة

هيخربوها علينا وهما ليهم فلل وقصور بره

خلاص هنبدأ عهد جديد ولا توريث بقى ولا تجديد

سيبوا الحكومة تشوف أحوالنا ده مفيش حد في بيته سعيد

متقلبوش الفرحة كابوس و أوباما افندي علينا يدوس

فرحنا أوي بللي عملتوه بس لو زادت هنلوص

حاجات كتير منها شكينا والمسؤولين اسيوا علينا

لكن فيه حلم بيتحقق بلاش نضيعوا بادينا

بلاش نضيعوا بادينا بلاش نضيعوا بادينا