للوطن غنت مشاعرنا جميع
واشتعل جمر الوفاء بقلوبنا
كلنا شيخ وفتى وطفل رضيع
كلنا جيناك يامحبوبنا
حاملينك في صحارينا ربيع
ناسجينك لابسينك ثوبنا
ذاكرينك بالدعاء والله سميع
ونافحينك عطرنا وطيوبنا
رافعينك فوقنا شان رفيع
نفتديك بسلمنا وحروبنا
عايشينك بالرخا رحب وسيع
ذاخرينك للظما مشروبنا
مشرق فينا مثل صبح بديع
ذايب في طبعنا واسلوبنا
امر وحنا على امرك نطيع
وين مارحنا عليك دروبنا
والله انا حصنك الصعب المنيع
والغشيم اللي يوجه صوبنا
مانساوم في غلاك ولا نبيع
فيك امانينا وبك مطلوبنا
..
من يشوف اللي وصلنا لا سال
وانشغل
كيف صار المر احلى من عسل
وش حصل
كيف صحراء الياس ضجت بالامل
والعمل
كيف حلم بعيد في لحظة وصل
واكتمل
..
خابرين بلادكم
خوف وضياع
خابرين اعيادكم
حزن وصراع
خابرين عيالكم
كثر وجياع
خابرين امالكم
حلم وخداع
..
انت ياللي جيت تسال في عجب
عن كفاح اجيال عن قصة شعب
ماعلى رب الملا شي صعب
بيده التقدير وهو اللي وهب
يوم اراد يحول القفره ذهب
سخر ويسر لها صقر العرب
عبدالعزيز
المقدم اللي قادها لامجادها واعيادها
المسلم اللي راية التوحيد خط امدادها
الشاهر اللي في ضلاله اكتمل ميلادها
الظافر اللي حطم الذله وفك اصفادها
العازم اللي لملم شتات النفوس وسادها
الحازم اللي مر في ضلال الديار وشادها
القايد اللي ساسها في حكمته وابعادها
العايد اللي صفرت فيه القلوب انشادها
..
هل السعد واستبشر المغبون واليوم عيد
وانزاحت الوحشة عن الدار وحضر شوقها
يامرحبا كثر الرمال وماحواه القصيد
تعداد وابل الغيمة اللي تزهر بروقها
جيت وجمعت الشمل ياشيخ العرب من جديد
واحيت شرع الله وكنت الشمس وشروقها
ودنت ياابو تركي لك الرايات علم وكيد
توحدت لك كل ابوها ورايتك فوقها
..
سجلت تاريخ ميلاد المراجل
والمغازي والحروب
واقتدى عهد بثوب العز رافل
ورفرف البيرق طروب
غرد النورس على صبح السواحل
وانتشى سمع الغروب
والشمال اودع سلامه للقوافل
يوم راحت للجنوب
غنت الوسطى اناشيد السنابل
والشذا ماغاب نوب
وانثنى غصن الهنا بحلو الشمايل
مع نسيم ومع هبوب
ارتفع صوت اسمنا بكل المحافل
والنواحي والدروب
وحد الله شملنا والصف كامل
والمحبه في القلوب
الله اكبر يابلادي .....
..
همه المه لبنه طينه
ياالله ياالله
على الله اتكلنا طالبينه
اله كل ابونا نستعينه
وشمرنا السواعد ثم بدينا
وكل صافح الطين بيمينه
سيقفنا دورنا عز وهيبه
عن البرد ولظى الحر ولهيبه
من جذوع النخيل ومن عسيبه
ومن زند لكفاحه من جبينه
كسينا ارضنا ثوب الحضاره
على دين وتوحيد وطهاره
ومشينا في خطانا للصداره
بكل اخلاص والله لا قرينه
للفضا
مد الغضا
كف الرضا
وقد الشكر عمران
وانقضا
عهد مضى
كل حضا
بالخير في خير الاوطان
البناء
هناك وهنا
في ارضنا
تجاوز الفن وازدان
والمنى
بجهودنا
صارت لنا
حقيقة نورها بان
واعتلى
صرح العلا
بين الملا
يثني على جهد الانسان
وانجلى
وجه الفلا
يوم امتلى
قد تروى بالاحسان
..
ارض يغازلها المطر
في كل عام
تهتز الى شوق وطهر
عكس البلابل والقماري والحمام
والمنهل اللي مانضب
ياسلام ياسلام
مرج على مد البصر
شوفه غرام
لونه ولا لون الزهر
خضرة غصونه من نعيم ومن سلام
فال تلاقي لها العرب
ياسلام ياسلام
خير على مر الدهر
جعله دوام
عشق سكن روح الشعر
لا يوصف لك لا بيت شعر ولا كلام
ياشوق من غنى وحب
ياسلام ياسلام
تظافرت كل الجهود
قامت على الوادي سدود
فاح الشذا من روضنا
وتزينت صحراء النفود
من سهلها وجبالها
تعطي ولا يعطى لها
خذت طباع عيالها
صارت على العالم تجود
خيراتها دايم تزيد
دايم مواسمها نشيد
يازينها طلع النضيد
من الحدود الى الحدود
..
امة الدين والسيف والقلم
امة الطيب والجود والكرم
والسماحة والمبادي والقيم
امة مامثلها بكل الامم
..
لا اله الا الله
نبينا محمد
لا اله الا الله

شعارنا الاوحد
بسم القريب المستجيب ابتدينا
وفي كل درب للمعالي رقينا
من يومنا وحنا هل العلم والدين
والنور والايمان منا وفينا
امه سعت للمجد
على هدى محمد
شعارها الاوحد
لا اله الا الله
شدنا الصروح العاليه واجتهدنا
صرتي لنا كل الفخر يابلدنا
ياما زرعنا من جهود وحصدنا
وافعالنا تحكي وتشهد علينا
متكاتفين اليد
على هدى محمد
شعارنا الاوحد
لا اله الا الله ..
اشرق النور بفرح
وروح الليل وضوا وجهه نهار
وضايق الصدر انشرح
ومابقى بديارنا للجهل دار
العدل ساد ورجح
والاماني غردت والياس طار
والشقا غاب ونزح
والتعب ياالله لك الشكر استدار
كل منهاج وضح
كل حلم كان بالوصغار صار
صوتنا الواعي صدح
فكرنا فاق المحاور والمدار
..
يارياحين الجزيره
ياحصاد اجيالها
انتم اشبال المسيره
باهلها وعيالها
ابن البلد
نعم الولد
في همته ماله مثيل
الله ياوجه السعد
دايم سعودي واصيل
لا يبالي بالصعاب
ياشباب الوطن ياشباب
سابقين الزمن ياشباب
انتم الصبح الصبوح
والعزيمه والطموح
والنسيم اللي جهاده
وبالوفاء اصبح يفوح
والسعاده والرغد
انتم عيال الاصول
شرعكم شرع الرسول
ومن تعنى للمعالي
واخلص النية ينول
ماعليه بمن حسد
انتم المجد الجديد
بهجة الحظ السعيد
وبسمة الارض الحبيبه
والاماني والنشيد
والحلا ويالشهد
من جد بالدنيا وجد
ابن البلد
نعم الولد
..
الحرب لا درج درج
لا بد من ساعة فرج
هبت رياحك يا الرخا
وصبح التباشير انبلج
ومادام شرع الله ضوا
نمشي عليه ولا حرج
ماهمنا كيد العدا
واللي حسد واللي هرج
العدل ميزانه رجح
والظلم فارقنا وهج
لك الحمد يامنعم علينا بالاسلام
وصلنا امان ماحصل وسط الاحلام
الابواب مفتوحه على مر الايام
ينام الصغير وتسهر عيون ضرغام
من الدين له سلم وموازين واحكام
يرد الحقوق ويرجع الباغي بحسام
لك الحمد ياالله
لك الحمد يارب لنا منه المجد
نصرناك يااللي دوم تنصر ومعبود
تحرى الخطر يامن تجرى على الحد
ترانا عزيز وكلنا دونه زنود
رسمنا غلاك في صفحة العز والمجد
عرين الاسود ومربع الخير والجود
وترانا مع اهل الود مانرخي اليد
ومع طالبين الشر نار وبارود
لنا بالسماء طير تشفق على الهد
راي يحل كل باغي ونمود
ومن جند ربي قوة سدها سد
حيل الحدود الخاين الجيره لحود
ترد الشبر ميل وتمد الجزر مد
سرايا على دين النبي ترهب حشود
..
تسامى ياوطن حقك تسامى
مادام انك على العالم تسامى
من ترابك ثرى مكه ويثرب
على ارضك مشى العز وتسامى
عزيز ماغزتك الا المحبه
منيع الا عن اخوان واحبه
رفيع فوق بعروش الاحبه
نزيه لا تضيم ولا تضامى
كريم ماطفيت النار بوجار
حشيم وحافظ مقدار للجار
حليم ماتهزك ريح من جار
قوي بالله ياصرح النشامى
لغير الله ابد محلي تهامه
عليت وبك نفوس مستهامه
من الشرق الى ساحل تهامه
جنوبك والشمال اللي ترامى
..
خادم البيت المشرف
الشرف فيه تشرف
تذكره مكه وطيبه
وكل من جاها وشرف
وسع حدود المشاعر
جاد في صدق المشاعر
ولا سال في مدح شاعر
والمعرف لا يعرف
والولي العد كفه
ترجح بمعروف كفه
فضله بدنه يكفه
مستفيض ما توقف
مزهر بالخير جاله
من يريد الشور جاله
من هل الراي ورجاله
بالمكارم مايوصف
ونائب ثاني موافي
ماتوفيه القوافي
ابيض اليمنى اسنافي
مسفهل ما تكلف
باسم يرضي بفاله
مايخاب اللي لفى له
كله بقول وحفاله
كم تلطف كم كم تعطف
عاشوا اشبال الامام
الميامين الكرام
فخرنا قادة بلدنا
للمحبه والسلام
..
للمليك المفدى حامي الامه
ولولي العهد والنائب الثاني
الولاء والغلا والعهد والذمه
للابد من خفوق كله ايماني
هم وريد الوطن شريانه ودمه
وتاجه اللي يشع بكل الازماني
ورافعينه بعون الله للقمه
وشعبهم بالسعاده والرغد هاني
وحلاة القلوب البيض ملتمه
بالعرين الحصين العالي الشاني
منبع الجود بيت العز والهمه
دار الاسلام ذخر الجار والعاني
موطن في سواد عيوننا نزمه
في ضمير الخلايق دوم ابو حاني
المشاعر تهف بلهفة يمه
كل قاصي يغني بسمه وداني
..
اسلم اسلم ياوطنا
انت فينا وانت منا
كلنا فيك نتغنى
وكلنا فدوتك حنا