هيه يا للي غرامك رحلتي للجنون
اشعل الشوق قلبي والغرام حطبي
اخذي الخافق اللي بالعهد مايخون
الخيانه ماهي طبعي ولا مذهبي

خلي الرمش ظلك ورقدي بالجفون
ونزلي يم صدري وبالضلوع ألعبي
نضديهن فداك اللي علي يسألون
وارجعي بعثريهن زي ما ترغبي

بس تسلا حياتي خلهم يتعبون
دام هالملك ملكك قرري واشطبي

وانسجي لك قلم من أي ضلعٍ يكون
خلي المحبره دمي ومنها اسكبي

وسجلي ذكرياتك بين ذيك الطعون
أكتبي لي أحبه أي شي أكتبي
وكان نبضات قلبي يالغلا يزعجون
اسكني صدري الأيمن ولا تذهبي

ولاهدا الجو عندك ياكحيل العيون
غردي مع مشاعرشاعرك واطربي
الله اللي وهبك من الغلا وش يبون
شمس حبك عسى يازين ماتغربي