مرحبا واعداد مالاح براق الغمام
في قدومك والله اللي كتب لي جيّـتك

مرحبا باللي على القلب لي برد وسلام
اشهد ان عروق قلبي بشوفك حيّـتك

يا سمي عبدالله العود مرفوع المقام
جدك اللي لا تحاميت فيه حميّـتك

وانت سميتك على ابوي حبٍ واحترام
من قبل تولد وتكبر واشوف لحيّـتك

جعل ربي يجعلك خير واحوالك تمام
ويصلح افعالك ويصلح معاها نيتك


ويجعلك حافظ كتابه وللناس الامام
ويكثر احسانك وطيبك ويستر سيّتك

ويجعلك فزاع للحق في فعل وكلام
كان ثارت هيّت الناس ثارت هيّتك

وتستر الزلات وتشوم عن درب الحرام
يوم ستر الناس يشبه لستر وخيّـتك

يا عريب الجد من خال والا من عمام
جعل ربي يجعل الطيب من ماريّـتك

ويجعلك في ربعك ولابتك درع وحزام
و جعلني أفرح على العز في ذريّـتك