تعطيني الود ولا تاخذه مني ... يبلّغك قلبي المقفي تحياته

اليوم يا صاحبي ردّ الخبر عني ... ما يرخص الغالي إلا كثر غلطاته

جارت عليّ الليالي وأحبطت ظني ... والحب ما عوّض الرجّال ما فاته

أدعي شفوقٍ تجي برضاك ما جني ... شاحت على الغالي اللي شفت زلاته

حمامة الحب فوق النايفه ظني ... في وادٍ تطرب الأسماع جرّاته

قصايدي يوم مات الحب ينعني ... في مقبل الوقت يالغالي سلاماته

ياللي برمح الغلا تسطي وتطعني ... وأنا معك خافقي محبوس غاياته


تبي الحقيقه عظيم الشوق موهني ... اليوم ساوى حسان الحب سيّاته

أببتعد عنك قدر اليوم ممكني ... ماهو بعيبن ٍ يعاف القلب مشهاته

بغيت عنك العزاء مرة وردني ... مشاعر ٍنصرها يلفح براياته

العام والا يجنّ اليوم ينهني ... عن حبك اللي جروحي من نهاياته

لك ذكريات ٍ جميلة يوم مرنّي ... ما وسّعت خاطر ٍ بإسعاد مرضاته

واليوم لولا المودة ما ضحك سني ... ما شنّ قلبي على فرقاك غاراته

نوازع الطيف ما جنّي وازارنّي ... في وحدتي تهدي الخافق مسرّاته

هذا وأنا خافقي للحب ما حنّي ... قلب ٍ بعد به مكان حبي هيهاته