تسقيف تسقيف .. وكلام تخاطيف

وحاجات بتخلى الناس خايفين

من غير معنى نازلين تخاريف

وتشقلب حال الكون تما

وتخلى ربيع العمر خريف

تسقيف والقلب حزين ع الناس

علشان الناس مطاطيه الراس

وحيارى حزانى فى يوم العيد ..

تسقيف والقلب حزين ع الناس

ماشين ورا كلمه بدون إحساس

وبدون معنى رايحين لبعيد ..

مع إن الكلمة متنفعشى

لو متشبعش الناس برغيف ..

الكلمة رصاصة متوجعشى

ولا تطلعشى غير وقت الجد

وإن مال الحرف عن السكة

هتقيم السيف ع الزيف بالحد ..

الكلمة وليدة هم الناس

مش نكتة تهز كروش أغوات

ولا حكم وإيد ناعمة بتنباس

الكلمة مقام أعلى المقامات ..

تطلع علشان الناس تجرى

ولا تطلعشى فى موكب تشريف ..

الكلمة عفيفة وإنسانة

لا بتدخل تسكر فى الحانة

ولا ترضى الباب فى الأسيتانة

ولا تبقى ذليلة ومهانة ..

أو فرشة طرية ودفيانة

غير للشغيلة الشقيانة

الكلمة الصادقة بتتحول

وبتنزل ع الظالم دانة ..

وتدمر عرشه اللى سبانا

وتخلى نهاره وليله مخيف ..