(اللوحة الأولى)
حول من القمره سلاطين وزحول
وأستبشرت بيد وضهاري خبر خير
جاها الفرج من عقب لا قو ولا حول
بعزم الامام الحر ونسل المناعير
ومن المليبد انطلق للملا خيول
وساق القرين لكل شعب التباشير
وكان الفخر لطريف وسمحه على طول
يوم انها شالت خطات الاساطير
كانت هنا البيعه على صادق القول
للي زرع بذره تحدت أعاصير
كانوا هنا اول طحاطيح وفحول
كانوا لنا قدوه على الحق والخير

(اللوحة الثانية)
عقب السعة ضاقت عليك الوسيعه
واستنجدت السمحان ويا الرفيعه
ثم انتهض زبن الدخيل وتزهل
واستل الأجرب ويل لمن لا يطيعه
واقبل على حمر الطرابيش كنه
سيل حدر ما له ومال الطبيعه
واودع ضحايا الحمر صم بكامى
وأعمى عيون أحلافهم بالفقيعه
رد الرفايع والعرين وغصيبه
ثم غدى له كل شبر تبيعه
واسس لنا تركي الامام المبجل
عهد على سنة أمام الشريعه

(اللوحة الثالثة)
ثم انقضى رب الملا كل خيره
لين اعتلى صهوة جواده معزي
جاب المطر في كل درب يسيره
يوم صرخ لعبيه يا عبيه لزي
وأقبل كما شمس في عز الظهيره
حول على العارض بلز وكزي

وأنشد أنا يسر الأمور العسيره
قومي لي يا دنيا وهلي وفزي
عبدالعزيز اللي له المستديره
تنوخ وتظهر كل شي متوزي
لو تحكي عنه كل هذه الجزيره
لا ما توفي وصفه وما تجزي
ردد وقال اللي تشبع بصيره
نامي يا درعيه وقري في عزي
ثم بسط خيره أيا كثر خيره
خير على هالأرض يكفي ويجزي

(اللوحة الرابعة)
واليوم في ظل السما ما انت في الأرض
في ظل منهو للملا معتلي فوق
اللي فرك خشم العدى ورضهم رض
سلمان ياللي ساكن كل معلوق
سلمان ياللي عزنا طول بعرض
لين اعتلينا كل أرض ومخلوق
منك الفخر يا سيدي يقترض قرض
وأعظم سجايا ما لها غيرك حقوق
سلمان ياللي فعيننا كنك الفرض
توجب لك الطاعة ويحرم لك العوق
كل البشر في الجاذبية إلى الأرض
انت الوحيد فجاذبيتك إلى فوق
وانتي تحت عهد ولاه لوليده
اللي على عزك حلف ما يجامل
يا محمد اللي كلنا بأمر ايده
يا مخزي وجيه العدا وكل هامل
يا بو الفكر والمقبلات السعيده
ياللي على تحقيق الأحلام صامل
ياللي من الله جيت فرحه لعبيده
تعجز على وصفك جميع الأنامل
فيك الوطن يا سيدي عاد عيده
وسمت ولدها محمد كل حامل
يا صاحب الرؤية الوحيده الفريده
من بعد أبوك وجدك انت اللي كامل