مانيب محتاج احد منهم يواسيني
شرفت من ضيقتي في راس مرقابي
مرقابي اللي الا قفّيت يدعيني
يدري ان مردي له ولو كثرو احبابي

الله يسامح غلاه وهقوته فيني
والله يسامح غروره ويش سوى بي
احسن لي العزله اللي تسرق سنيني
ولا علاقة حدا ما يحسب احسابي

راح ف طريقه وانا الله لايخليني
ان ما ردعه الوفا ماينفع عتابي
بيحس في قيمة اللي بينه وبيني
وبيعرف وش قيمتي لا طول غيابي


اصلا وش اللي لقيته من محبيني
واصلا وش اللي لقيت من اكثر اصحابي
كم واحدٍ طاح من قلبي ومن عيني
وكم واحدٍ خاب ظني فيه واعجابي

وكم واحدٍ لاكثر مالي يصافيني
وان قل مالي ما عاد اقبل على بابي
يدي لا مدت وفا ما عاد يمديني
اخشها يا سعد في جيب جلبابي

على كثر ما لحقني من معاديني
والله ما جاني مثل وجعات الاقرابي
اللي يسليني البارح وينسيني
قدهو يضيق علي ويتلف اعصابي
الناس فيهم بلا ولا البلا فيني
منين ماجيت اضحي لشخص ضحى بي