الناس من الغلا بتلالى والشعب حيعمل إيه

حتى السكر بقى غالي والناس حتحلى بإيه..

كيلو السكر ب8 و9 و10 ساعات..

لا حنشرب تاني عصاير ولا نأكل حلويات..

الحلبة خلاص والقهوة حتبقى كلها سادة

ولا خلى السكر بره ولا فيه مظبوط وزيادة

السكر اصبح ذكرى وجروحنا زادت جرح

وخلاص كلنا من بكره حنحلى الشاى بالملح

ياللى أنت عندك سكر اتهنى وقول يا بلاش

طب إنت جابولك سكر فى ناس لسه مجلهاش

قاعدين كلنا بنفكر فى المجلس والجلسات..

أهو غلوا علينا السكر وآدى آخرة الانتخابات

علقنا يفط ومشينا ومسكنا لبعض سيوف

ولا شوفنا حد بيخدم ولا عمرنا يوم حنشوف

عيش مرة وسكر مرة ومنين الناس حتجيب

حق النور والمية واللحمة والأنابيب

مبقاش لا مرتب نافع ولا حافز ولا علاوات

السكر بس عايز له ميزانية وسلفيات

الناس تعبانة وحايرة وانتخبوا لكن عارفين

مش حيشوفو ابن الدايرة غير بعد 5 سنين