على اسم مصر – صلاح جاهين

على اسم مصر التاريخ يقدر يقول ما شاء أنا مصر عندي أحب وأجمل الأشياء باحبها وهي مالكه الأرض شرق وغرب وباحبها وهي مرميه جريحة حرب باحبها بعنف وبرقة وعلى استحياء واكرهها وألعن أبوها بعشق زي الداء واسيبها واطفش في درب وتبقى هي...

عيني رأت عصفور ووياه ابنه – صلاح جاهين

عيني رأت عصفور ووياه ابنه بيحدفه في الريح وياخده ف حضنه نوبتين وتالت نوبه عجبي عليهم كانوا سوا بيرفرفوا ويغنوا عجبي

غسل المسيح قدمك يا حافي القدم – صلاح جاهين

غسل المسيح قدمك يا حافي القدم طوبى لمن كانوا عشانك خدم صنعت لك نعليك أنا يا أخي مستني إيه .. ما تقوم تدوس العدم عجبي

البط شال عدَّى الجبال والبحور – صلاح جاهين

البط شال عدَّى الجبال والبحور ياما نفسي اهجّ … أحج ويا الطيور أَوصيك يا ربي لما أموت … والنبي ما تودّنيش الجنة … للجنة سور عجبي

يا للي ف حماه الشمس تلقى الملاذ – صلاح جاهين

يا للي ف حماه الشمس تلقى الملاذ وألف بكره وبكره … في ضلوعه لاذ مين انت ؟ مارد ؟ رب ؟ قال لأ ده بس انا اللي باروي القمح واسقي الفولاذ عجبي

لا تجبر الإنسان ولا تخيّره – صلاح جاهين

لا تجبر الإنسان ولا تخيّره يكفيه ما فيه من عقل بيحيّره اللي النهارده بيطلبه ويشتهيه هو اللي بكره ح يشتهي يغيّره عجبي

يا للي بتبحث عن إله تعبده – صلاح جاهين

يا للي بتبحث عن إله تعبده بحث الغريق عن أي شيء ينجده الله جميل وعليم ورحمن رحيم إحمل صفاته … وانت راح توجده عجبي

حقرا وفوق كوكب حقير محتقر – صلاح جاهين

حقرا وفوق كوكب حقير محتقر في الكون تكون دنياكو إيه يا بَقَر رملايه من صحرا ؟ .. لكين إيش تقول والكون بحاله جوّه عقل البشر عجبي

يا للي انت بيتك قش مفروش بريش – صلاح جاهين

يا للي انت بيتك قش مفروش بريش تقوى عليه الريح . يصبح مفيش عجبي عليك حواليك مخالب كبار وما لكش غير منقار وقادر تعيش عجبي

الدنيا من غير الربيع ميّته – صلاح جاهين

الدنيا من غير الربيع ميّته ورقة شجر ضعفانه ومفتفته لأ يا جدع غلطان تأمّل وشوف زهر الشتا طالع في عز الشتا عجبي

حبيت لكن حب من غير حنان – صلاح جاهين

حبيت .. لكن حب من غير حنان وصاحبت لكن صُحبه ما لهاش أمان رحت لحكيم واكتر لقيت بلوتي إن اللي جوّه القلب مش ع اللسان عجبي

ليه يا حبيبتي ما بيننا دايماً سفر – صلاح جاهين

ليه يا حبيبتي ما بيننا دايماً سفر ده البعد ذنب كبير لا يُغتفر ليه يا حبيبتي ما بيننا دايما بحور أعدي بحر ألاقي غيره اتحفر عجبي

مهبوش بخربوش الألم والضياع – صلاح جاهين

مهبوش بخربوش الألم والضياع قلبي ومنزوع م الضلوع انتزاع يا مرايتي يا اللي بترسمي ضحكتي يا هلترى ده وش والا قناع عجبي

أنا قلبي كان شخشيخة أصبح جَرس – صلاح جاهين

أنا قلبي كان شخشيخة أصبح جَرس جلجلت به صحيوا الخدم والحرس أنا المهرج .. قمتو ليه خفتو ليه لا فْ إيدي سيف ولا تحت منى فرس عجبي

دخل الربيع يضحك لقاني حزين – صلاح جاهين

دخل الربيع يضحك لقاني حزين نده الربيع على إسمي لم قلت مين حط الربيع أزهاره جنبي وراح وإيش تعمل الأزهار للميتين عجبي

بين موت وموت بين النيران والنيران – صلاح جاهين

بين موت وموت .. بين النيران والنيران ع الحبل ماشيين الشجاع والجبان عجبي عَلادي حياة .. ويا للعجب إزاي أَنا يا تخين بقيت بهلوان عجبي

قالوا الشقيق بيمُصّ دم الشقيق – صلاح جاهين

قالوا الشقيق بيمُصّ دم الشقيق والناس ما هيَّاش ناس بحق وحقيق قلبي رميته وجبت غيره حجر داب الحجر … ورجعت قلبي رَقيق عجبي

يوم قلت آه سمعوني قالوا فَسَدْ – صلاح جاهين

يوم قلت آه .. سمعوني قالوا فَسَدْ ده كان جدع قلبه حديد واتحسد رديت على اللايمين أنا وقلت .. آه لو تعرفوا معنى زئير الأسد عجبي