جعل السحاب اللي معه برق ورعود
يمطر على دار ٍ وليفي سكنها
يسقي وطن منتوقة العنق يا سعود
مالي وطن بالعارض الا وطنها

قلبي غدا وإستيسره لين العود
ماحد ٍ يفك القلب ياسعود منها
ساطي وفي كفه قديحه وبارود
وأدخل يده بين الضلوع ودفنها

بيني وبينه وصل وأسرار وعهود
مصيونة ٍ ماتدري الناس عنها

في كل عام يزود حبه بعد زود
أقفي بروحي والتوى بي رسنها

أموت بين الخد وعيونه السود
وحواجب ٍ ربي بملحه قرنها
وشعر ٍ بدهن الورد والمسك مكدود
جديلة ٍ تضمني وأحتضنها

ليل ٍ جمعني به عسى ليت ويعود
يبعد عن النفس الحزينه حزنها
جعل السحاب اللي معه برق ورعود
يمطر على دار ٍ وليفي سكنها