استغفار – تميم مريد البرغوثي
يا أيها المصلوب عشاني غلطت فيك
من غير ما يبقى فيه حجر على صدري
أو يطلع علينا الصبح بدري
أو يقوم يدن ثلاث مرات في عز الضلمة ديك
من غيرما يعلن حلف روما واليهود عن جايزة كبرى للي يرشدهم عليك
انا لما شفتك مت لجل ان احنا نحيا
غلطت فيك
أحنا هنحيا يا وديع من غير ما تفدينا
وموتك مش هايعمل حاجة غير انه يبكينا
سنين وسنين ونرجع زي ما كنا
بمحاسنا ومساوينا
بموتك بس هانعيد الصياغة من الهياكل للكنايس
بس رح تبقى المدينة
هيه هيه خاطية وبترمي الحجارة عالخواطي
عندها الرب احتياطي
والقلق فيها تمام زي السكينة
بس انابقى خسرت صاحب
أحلى منهم كلهم
وبراءته دي هيه اللي خلليتني أحبه
واكرهه لما يقرر يفتدينا
غلطنا فيك لما طلعت على الصليب
واللا انت لما سبتنا على الأرض تبقى غلطت فينا
أيها المصلوب عشاني غلطت فيك
من غير ما يبقى فيه حجر فوق صدري
أو يطلع علينا الصبح بدري
أو يقوم يدن ثلاث مرات في عز الضلمة ديك
من غيرما يعلن حلف روما واليهود عن جايزة كبرى للي يرشدهم عليك
انا لما شفتك مت لجل ان احنا نحيا
غلطت فيك
لا يوجد تعليقات حالياً