ياصوتك اللي لا لفى في مسمعي
يفز قلبي من غلاته يسمعه
يفز قلبي من الوله بين اضلعي
واسافر بصوتك لدنيا ممتعة

في عالم ثاني ما دامك انك معي
وامشي مع احساس المحبة واتبعه
واذا انت تظن الوله لك مدمعي
خله بكيفه لا تحاول تمنعه

انت البداية والنهاية ومرجعي
وفي بحر حبك تحضن الريح أشرعه
ريح الوله ذابت غلا بين أشرعي
وجهة غرام بلا تذاكر وأمتعه


انا رسمتك حلم قبل ان أعي
واعيش بك قمة غلا واستمتعه
وانا عشقت العمر لانك واقعي
وان غبت قلبي كل شيٍ آه يوجعه

الابداع ليس في قريض الاصمعي
ولاحظ من حار العراق بمسمعه
الشعر ابداع القلوب بما تعي
ولا خير فيمن يوصله و لا يشبعة

من أجمل الاشعار يا نفس ابدعي
في حضرة جموح القصيد المبدعة
وأقولها خلك معي خلك معي
أصعب من انه ينبض ومنت معه