انعست عين الغلا والهوى هدا ... خانت الايام والملح والعشره

وابتديت تشوف نفسك وتتحدا ... وأنت ماكنت تتغلى ولا تشره

كنت مجروحي وصرت الدوا والدا ... كنت آآه صرت آآهات منتشره

غلطة اللي بالمحبه أخذ وأدا ... واعترف لك بالغلا وابصمت عشره

الهوى جاب الغلا والهوى ودا ... وأنت وجروح الزمن بالحشا خشره

يابعد من مابعد جا ومن هدا ... ويابعد من ساج روض الحشا نشره

يوم صار الحب جزيه ولك تدا ... والقصيد اسهل من كتابته نشره

خذ قصيدي ياشذا الورد لاندا ... وأنتبه لي واستمع موجز النشره

والله أنك بالغلا فارق جدا ... مثل فرق الابتسامه عن الكشره