أنا موافقة..ما فيش حاجة بينّا متكافئة
و يا خسارتي فـ حياتك كنت أنا مكافأة
ما فيش حنيّة تتقابل مع القسوة
فـ لو أكمّل معاك هبقى أنا منافقة

لا أنا أشبهلك..ولا أنا زيّك، ولا أستاهلك
وأنا فـ كلّ الظّروف أنا ناوية أتجاهلك
سيبك منّي ويا ريت ما تقولش ولا كلمة
عشان عارفاك كلامك كلّه مستهلك

أنا هبطّل مقابلاتك
هبطّل أحبّ وحياتك

يا ريت تدعيلي إنّي أنسى
وكتّر لي، في دعواتك

راحت جنبك، راحة بالي
فـ علاقة ما كانتش لايقالي
فلا أنت بقيت "حبيب سابق"
ولا هتبقى..."حبيب حالي"

بلا طيابة... بلا محبّة، بلا خيابة
بعيد تفكير عشان ما أضعفش وأتغابى
دا أنا حياتي غنا وفرحة، وأنا لوحدي
لكن جنبك حياتي هتتملي كآبة