ليه ساكت و دايمًا قليل الكلام
وماسك في جملة كويس تمام

مداري بهدوئك
صراعك حروبك
سلامك في حربك
وحربك سلام

في عينك حكاوي وقصص كتير
وشايل وشكلك معبي بضمير

وباهت ومطفي
وواضح في صفي
اكيد انت من اللي طموحهم كبير

وحلمك جه يلمح ظروفك فغاب
وفاجأك وخلاك مريض اكتئاب
بتنزف وشكلك مكبر في عمرك
ملامحك مسنه في سن الشباب

وعايش تضيع في وقت وسنين
هتهرب لأمتى وهتهرب لفين
بتوجع في قلبك وتجلد في نفسك

وعمرك بيجري معشتش يومين

يا ريتك بتشكي بتصرخ تقول
يا ريتك تفكر وتعرض حلول

يا ريتك تسيبك
وترضى بنصيبك
يا ريتك بتقبل كلام العقول

تراكم جروحك مخلص عليك
مدمر حياتك مكتف ايديك

ده حلم اللي سابك تضيع لما سابك
وضعت لما سابك وشمته فيك
فين انت بهزارك وفين اللي كان
ليه طلة وحضوره بيملى المكان
فين انت وشقاوتك وروحك وعندك
اكيد انت واحشك بنسخة زمان
حاولت وعافرت وأمنت وسعيت
سرحت بخيالك في واقع صحيت
بتقسى وهتقسى ولا يمكن هتنسى
تعبت وياريتك ياريتك لقيت