يقسى الوقت وتقسى الظروف وتضيق الأحوال
ونفقد الحلم وتموت الأماني مانحققها
أشوف الضيق له مده يجدد له معي موال
وفقدت أيامي الحلوه وحزني قام يسرقها
وألا يالصاحب اللي عن حياتي تطري الترحال
تراها ضايقه بي وأنت بالطاري تضيقها
حبيبي جيت أدور بك عن شموس الزمان ظلال
لقيتك شمس في عمري أبد ما غاب مشرقها
تعذرلي تقول ظروفي الصعبه تهد الحال
وأصدقها لو اني ماني بمجبور أصدقها
أعرف اللي يحدك عن غرامي ياوسيع البال
وأعرف أسرار قلبك لو بغيت أكشف حقايقها

وأقدرلك ظروفك وأحتري منك ليال وصال
وأنا عندي ظروف وضيقتن ماني بطايقها
تعال وخلنا ننسى مدام ان الدروب طوال
تعال وصفحة الماضي نبي ننسى ونحرقها
تعال وكل شي تطلبه ياصل بدون جدال
تعال وبختصر عذب الكلام بكلمه أنطقها
أحبك ايه أحبك شف غرامك كيف صال وجال
ب قلبي لين صرت أهوى طيوفك حيل وأعشقها
نسيت الناس والدنيا وجددت ل غلآك آمال
معاك أحس في طعم السعاده وأتذوقها
أحبك كثر ماني مقتنع بان الوصال محال
كثر ما رحت أبا أفارق طيوفك جيت أعانقها