يايبه يانور عينٍ تبلشها السهر ... يايبه ماجور ماجور يانسل الكرام
يايبه ياعزوتي من صواديف الدهر ... يوم طير الظيم فوقي نفض ريشه وحام
لأجلك العين انتثر دمعها دمٍ حمر ... والحشا كنه على واهج الرمضا حطام
يايبه وإن خانك الساق أنا ساقك وسر ... ان بغيت السهل والا شواهيق العدام

يايبه وإن قصر الشوف شوفك ماقصر ... دامني لك شوف وعيون فوقك ماتنام
يايبه وإن خانك الكف أنا كفك حجر ... إضرب بي اللي تبي هامةٍ والا قوام
يايبه وإن خانك السمع أنا إذنك فالبشر ... في ذمتي ماتسمع ألا خبر عزك يقام
يايبه وإن خانوا أصحابك أنا صحيبك جبر ... مير مافأصحابك اللي عطى درب الملام

يايبه وإن درهم القوم أنا دونك بحر ... والله إن تبطي مضاريبهم برد وسلام
يايبه لاغطرف القمري الشادي ودر ... جر هاجوس المعنى عليك أحلى كلام
يايبه ياعزة الجار وضيوف السحر ... يامزبن واحدٍ طقته بقعا وهام
مالقيتك بفرجة السوق تصلخ وتهدر ... الك عند الناس قدرٍ وهيبة وإحترام

ولاأنت باللي فوق جاره عصاته تنكسر ... يمدحك جارك وضيفك وربعك والخصام
وكان سبَّل عسعس الليل ثوبه واستتر ... شف دمعك في صلاتك مثل وبل الغمام

ياعسى يفدى قدم رجلك اللي ماانعثر ... رجلك اللي ماسعت كود في عز المقام
كم وكم فنجال بنٍ بمجلسك انتثر ... مجلسٍ للعود الأزرق على وكره مرام

وكم سمانٍ راعي الضان لقدومك ذخر ... حثهن بأطراف كفك لضيفانٍ حشام
كن نقفة دمهن فالثرى سيلٍ حدر ... وكن ريح شحومهن فالفضا ريح الخزام
يايبه شفت الليالي مجاهيم وعفر ... عن مباغيت المنايا التهينا فالحطام
كلنا يدرق عليه الزمان وينتثر ... فوق منصوب الشداد وعلى ظهور المسام

يايبه من زاد كاد وخفى عزه شهر ... وأنت عزك فالخضيرا جلا جنح الظلام
يايبه من هام شيٍ وهو ماله ظهر ... ذاق دون اللي يبي مزة الحنظل شمام
يايبه من يبغي المجد من دون معذر ... مثل زارع شتلةٍ فالصبخ يبغى الصرام
من همل فرجه بليا سمينٍ ماظفر ... تنطحه شمسٍ تجدويه مطعوم السمام

يايبه تسبيحةٍ يوم جنح الليل در ... ماتساوي وزنها كنوز مصرٍ والشوام
يايبه ماشق صم الصفا غير الصبر ... والكدر عقب الصبر ينتحي مثل الحلام
يايبه دنياً لقينا لها بطن وظهر ... الحظيظ اللي بها عز نفسه واستقام
والختام بريح مسكٍ وريحانٍ ذعر ... الصلاة الزاكية من ضميرٍ مستهام
للنبي الهاشمي صاحب الكف الخضر ... عد ماغنى على خضر الأغصان الحمام