هلَّت سحايبها من الحب هتَّان
واستبشرت قاع الفؤاد بحياها
ثم أشرقت شمسٍ على قلب بردان
واستنعشت كل العروق ابدفاها

وازهر ربيع القلب من كل الالوان
وهبَّت على صدري نسايم هواها
نسايمٍ ذعذاعها داعب اغصان
خضرٍ شعاع الشمس يطرد نداها

وغنَّت بصوت الورق عذبات الالحان
واطرب جميع احساس فيني غناها
قالت لي بدارك مقاصيد والهان
وغاية مقاصيدي بدارك رضاها


قلت أرحبي ياسيدة كل من كان
داري قبل لاالقاك ممحل ثراها
شوفك سقاني بعد ماكنت ظميان
والروح باحسانك قطعتي ضماها

ونورك جلا ياالمترفه ليل الاحزان
واسترجعت حلو الليالي ضياها
والبسمه اللي باتت بحجر سجان
تحررت من جور همٍّ سباها

من صادق اعماق الغلا سر وعلان
اقبل علىٰ النفس العزيزه عطاها
يامستحل القلب والحب سلطان
كل المشاعر بايعتلك ولاها