أنا لله .. سلمت الأمر
ماشي بقول .. معلش الصبر
أيوة صحيح .. بتشد الريح
بس أكيد .. اخرتها بجبر

حملي تقيل .. وأنا قده وشلت
شوفت كتير .. ولا مرة زعلت
أنا طمعان .. أرتاحلي يومين
كعبي خلاص .. داب مالأسفلت

نفسي أرتاح والله إن شاء الله يومين فالشهر
ياما تعبت وشوفت النجمة فـ عز الضهر
حكم المولى فضل ونعمة ومش زعلان
زي ما تيجي بايس ايدي وش وضهر

مش طمعان فـ فلوس بالكوم ولا عايز قصر
ولا طمعان الناس يشوفوني سبقت العصر
أنا مش عايز غير الستر ولقمة حلال
ربنا يرضى عليا ويجبر فيا الكسر

ايه ياهموم .. والله تعبت
مالأوجاع .. عجزت وشبت
شعري أهو شاب .. والوش شباب
أنا خسران .. ولا مرة كسبت

كل ما أقوم .. ألاقيني وقعت
انا موجوع .. ولا مرة وجعت
روحت وجيت .. تعبان وشقيت
بس بايه .. مالدنيا طلعت

الأحزان عمالة فـ قلبي تشيل وتحط
والأفراح مشيت على خط وسابت خط
أنا مولود فـ الدنيا بحاسب على فواتير
عملت فيا كتير والله وبرضه سكت

شايل حمل تقيل والله وقطمة وسط
حيلي اتهد ومن أوجاعي يا دنيا خلصت
هو اشمعنى الحزن بيجي جملة وكاش
بس الضحكة بتيجي يدوب بالعافية وقسط