like-empty

كلمات

klmat.com

sun

لحن الفراق

خيالي كما حرن من النادر المرغوب
ليا هد في خرب الحباري نثر دمه
دعيته وانا فكري من البارحه مشبوب
على صدر مجلس والهواجيس ملتمه

لضاقت بي الدنيا وباب الفرج محجوب
وملت عيوني من هل الحسد والنمه
اجيله على عجلن من أمري وفيه اجوب
على اسواره أنثر ما خفى الصدر ولمه

واذا هب في ريح النفل والخزام هبوب
لعب في خفوقي مثل ما لاعب العمه
من اسباب حبن في عروش الحشا محسوب
نشا في صباي وشلت رغم الصبا همه

سقيته وفا من صافي الروح ذوب وذوب
وهديته سنين العمر من صادق الذمه
وعلى صوت خطوات الجفا والفراق يشوب
صحى الحالم وسالت دموعه على كمه

رحلتي وأنا باكي على حلمي المنكوب
سوات اليتيم اللي بكى من فراق أمه
ليا مر فيه اللي شكى الحظ والمكتوب
رجع ما شكى من لايعن بالصدر لمه

من الحزن والتنهيد خدي علاه شحوب
وفي عين تفرح فيك بث السهر سمه
ومن دنيتي وجه الفرح والسعد مسلوب
بلحن الفراق اللي تقاسيمه الغمه

وعن عاذلن ماله مع أهل الغرام دروب
خفوقي رغم طعن العذل مالفت يمه
تعب ما برى المسحور من سحره المشروب
وأنا شاربن حبك من الجم للجمه
like-empty

كلمات غريب ال مخلص

جاري التحميل...