كلّه منّي لنت لين اللين لك قسّاك
لو عطيتك عمري كله ما شريت رضاك
مهما جيتك صح لازم أرجع الغلطان
ماني قادر حتى ألقى نص حل ويّاك

ما بقت لي كلمة حلوة إلا صباح الخير
وبعدها العتاب يبدي وأبتدي التبرير
وأتسابق ويّا زعلِك من يعدّي اليوم
وراحت أيّامي أحاول أثبت إني غير

العلاقة دوري فيها بسّ أسوّي اللي تبيه
شكلي بقلبك ولكن بالحقيقة ماني فيه
أصغر أغلاطي بحقّك عندك أكبر من غلاي
وأكبر أغلاطك بحقّي لنّ أحبك ما عليه

مهما أحط الكون بِعْيونك بِيبقى فيها زود
إنت مو جاحد طبيعي إنت مبدع بالجحود
صعبة أحبك قد مَاتحب نفسك وتعشق أناك
صبري له حد ونهاية وإنت أناني بلا حدود


لأجل أشوف بعيني لازم منّها تنشال
وبالي بيرتاح لمّا ما تمر عالبال
ما بقى عندي تنازل بس نِزَلْت لوين
وإنته مَا يبيّن بِعينك شيْ بِكل الأحوال

ليه أضيّع باقي عمري في سبيل إنسان
ما يحسْ بالراحة إلا إنْ شافني تعبان
آنا أوْلى فيني منّك دام ما بك خير
رابِحك خاسر وربّي وخاسرك ربحان

من كثر تهديدك في بعدك على بعدك قويت
ودام طيبي ماهو نافع وش يضرني لا قسيت ؟
ضامن وْجودي بطريقة حسستني ب إنعدام
ناسي إنّي لي كرامة وأقدر أرحل لا بغيت

إي نعم هالمرة آنا اللي بغيب وما أبيك
ما أخذته من حياتي كافي وزايد عليك
الشعور اللي تسبب في تماديك بيموت
ورني أقوى فراق عندك وإحلم إني راح أجيك