خمسين سنة – جمال مرسي
خمسين سنة
فاتت كما طرفة بصر.
مرت قوامْ .
زي السحابة اللي نزل منها المطر
نزلت على الأرض الوسيعة و نبِّتت
معرفش خير كان عشبها لما طلع
أو عشب يابس فيه ضرر ؟
خمسين سنة
مرت بأيامها الطويلة ،
زي نسمه رجعتني للطفوله ،
لما كان الحلم أخضر
و الصبا بستان مزهّر
و الأماني مستحيله .
كنت بحلم
إني جنب النجمه ساكن
إن ليَّ جناح طويل طول المدى
و ان صوتي لما يطلع راح يدوّي في الفضا
مرت الأيام قوام
و امتطت خيل الكهوله
و الصهيل كان له صدى :
صوتك تعبته كتير و لكن ..
ميت خسارة ، ضاع سدى .
خمسين سنة
فكرتني يا صاحبي ليه باللي مضى ؟
أنا كنت هطوي صفحة العمر الطويل
اللي انقضى .
و أفتح كتاب الموت ..
لأن اللي بدا راح ينتهي كيف ما بدا
لكن لقيتك جاي في اديك " الفانوس "
و الشمعه آيده بالأمل .
" سدت دروب الموت " تقولها ..
عيش حياتك يا بطل .
و ابعد بلاش اليأس جواك يوجعك
" لسنا معك "
دا الموت بإيد ربك إذا كتبه عليك فما
" لك الاختيار"
عودتنا إنك تكون شمس النهار
علمتنا كيف " الصمود "
مديت ايديا بكل حب و قلتلك :
خدني معك
هفضل أحبك يا ابن قورة
بس حبي زي نار،
لو تلسعك
اوعك تقوللي يا ابن مصر بتوجعك .
علشان ودادي في فؤادك كان كبير .
لازم يخَلَّى القلب يتجاوب معك .
ما أروعك
كلمات خمسين سنة
قسم: جمال مرسي
لا يوجد تعليقات حالياً