الحب معميني – محمد عمر

الحب معميني و لا اشوف عيبه

لو كان حبه ساقني للبهاذيل

مقدر أميز خبث قلبه و طيبه

مثل الكرم يمحى عيوب الرجاجيل

الحب لى صابك يجيبك غصيبه

شيٍ حصل ما فيه قوه ولا حيل

مهما اكابر له بعيني و أريبه

يفسر اشواقي دموعٍ كما السيل

اكذب اذني في كلامٍ حكي به

و اناقش العاقل على الهرج لى قيل

واقعد افكر في امورٍ عجيبه

لى من غديت بوحدتي تالي الليل

مدري رفيقي و ين دربه يجيبه

في الخلف ولا راح في مقدم الخيل

دنيا بها العاشق يدور نصيبه

يا الله عساها تنتهي بالتساهيل

0

كلمات: تركي بن عبدالرحمن

ألحان: محمد عمر